12:20 P.M

©Zayed Aldrin Tan

 

12:20 P.M. SA CTC 205 TUWING

 MONDAY, WEDNESDAY AT FRIDAY

- Zayed Aldrin Tan

                                              Dingdong! Kampanilya’y biglang tumaginting.

                                              Cactus, mga tinik sa ‘ming dibdib, dumating,

                                              Takda ng aming pagsubok,isang piging,

                                              Calamansi, pumatak sa matang lasing,

                                              Dingdong! Ang lahat, biglang napahalinghing.

                                              205, numerong nakaduduling,         

                                              Dingdong! ‘yan ang hinihintay ng mga praning.

                                              Sinusubok ang lahat, pinaniningning.

                                              Ehersisyong mahirap, nakalilibing.

                                              Cactus, tinik sa dibdib muling dumating,

                                              Talagang sinusubukan, aming galing!

                                              Isipin at makinig, may mararating,

                                              O tumulala’t dumungaw, parang kambing.

                                              Ngunit iba’y nanawagan, parang supling.

                                              Dingdong! Kumalma sa wakas, mga butanding.

                                              Uusbong, baon ang araling malambing,

                                              Uunlad, patuloy lalago ang sining.

                                              Dingdong! Kampanilya’y muling tumaginting.

 

 

12:20 P.M

Kampanilya’y tumaginting.
mga tinik sa ‘ming dibdib dumating,
Takda ng aming pagsubok, isang piging,
Dingdong! Ang lahat, biglang napahalinghing.
Dingdong! ‘yan ang hinihintay.
Sinusubok ang lahat, pinaniningning.
tinik sa dibdib muling dumating,
Isipin at makinig,
O tumulala’t dumungaw.
Dingdong! Kumalma sa wakas.
Uusbong.
Uunlad.
Dingdong! Kampanilya’y muling tumaginting.

 

Umis sa halip ng ngiti

Umaabot hanggang tainga o kahit bahagya lamang, ang ngiti ay hindi nawawala sa buhay ng mga Pilipino. 

Marami mang mahirap sa ating bansa, ang pagngiti ay hindi pa rin kinalilimutan ng ating mga kababayan.

Ito ang tatak ng mga Pilipino, ang ngiti. Sa paggamit ng salitang ngiti, nasa bingit na ng pagkabura ang isa pang salitang tagalog para sa ngiti, ang umis.

Sa mga nakababasa nito ngayon, sana gamitin natin ito. Ang ating mayamang bokabularyo ay unti-unti ng nababawasan dahil sa paggamit natin ng mga pangkaraniwang salita. Itaguyod natin ang sariling atin  at huwag nating pagbayaang ma-ibaon ito sa limot.

"Sa iyong ngiti ako'y nahuhumaling" - Ngiti ni Ronnie Liang

Umaabot hanggang tainga o kahit bahagya lamang, ang ngiti umis ay hindi nawawala sa buhay ng mga Pilipino. 

Marami mang mahirap sa ating bansa, ang pagngiti pag-umis ay hindi pa rin kinalilimutan ng ating mga kababayan.

Ito ang tatak ng mga Pilipino, ang ngiti umis. Sa paggamit ng salitang ngiti, nasa bingit na ng pagkabura ang isa pang salitang tagalog para sa ngiti, ang umis.

Sa mga nakababasa nito ngayon, sana gamitin natin ito. Ang ating mayamang bokabularyo ay unti-unti ng nababawasan dahil sa paggamit natin ng mga pangkaraniwang salita lamang. Itaguyod natin ang sariling atin at huwag nating pagbayaang ma-ibaon ito sa limot.

"Sa iyong ngiti umis ako'y nahuhumaling" - Ngiti ni Ronnie Liang

Puno

Bakasyon

Bilang estudyante, hindi ko maikakaila na ang bakasyon ay talagang iniintay ko. Ito ang itinuturing kong pabuya para sa paghihirap na pinagdaanan  ko sa nakaraang akademikong taon. Ang mga larawan sa ibaba ang mga nagdaang bakasyon na naranasan ko kasama ng aking mga kapamilya. Habang bakasyon, dito ko mas nakikilala at nagiging kalapit ang pamilya ko mas lalo na kapag nag-iintay kami ng eroplano o barko.

Ang pinaka-ikinasisiya ko sa bakasyon ay ang pagkalapit ko sa kalikasan. Dito, nadidiskubre ko talaga ang tunay na kagandahan ng kalikasan. May mga lugar na lingid sa kaalaman ng iba, at ikinasisiya ko na isa ako sa kaunting mga tao na nakaaalam ng lugar na iyon katulad na lamang ng Estrella Falls sa Palawan. 

Palapit na ang bakasyon ng unang taon ko sa kolehiyo. Ako ay nanghihinayang at nalulungkot na dalawang linggo lang ang bakasyon sa halip ng dalawang buwan. Pero sabi nga sa Ingles, "Everything changes". Lahat ay nagbabago at isa lamang ito sa maraming pang mga bagay na magbabago sa buhay ko. Ang kolehhiyo ang simula ng panibago kong buhay ang nais ko lang ay sana wala akong pagsisihan sa panibagong buhay na tatahakin ko.

Eleksyon 2013

Mga matang nakamasid,

Mga taingang nakaririnig, 

Ngunit tinikom ang bibig

Ng takot na nanaig.

Kailan...

Kailan kaya ang taong bayan, 

Titindig para sa kinabukasan

Ng ang hinaharap ay abangan?

Pilipinas ay umunlad,

Iyan ang hinahangad.

Ngunit hangari'y 'di sapat,

Kapag pagbabago'y 'di tinahak.

Tiyansang pagbabago'y parating,

Sana'y huwag isantabing.

Mga kandidato'y kilalanin,

Ng kapahamaka'y hindi sapitin

Tula: Noon at Ngayon

Ang imahen sa itaas ang nagsasaad ng aking pananaw hinggil sa pagtula noon at ngayon. Ito ay nahahati sa dalawang bahagi: ang kaliwang bahagi at ang kanang bahagi. Ang nasa kaliwang bahagi ng imahen ang nagsasaad ng pagtula noon at ang sa kanan naman ay ang pagtula sa kasulukuyan.

Makikita sa imahen sa itaas na may isang tao sa sentro. Ang nakaguhit na tao ay nahahati sa dalawang bahagi. Ang nasa kaliwang bahagi ay nakaguhit gamit ang kulay puti. Ito ay nakaguhit na puti dahil sa pagkawalang-malay ng mga tao sa iba-ibang estilo ng pagtula. Sa kanang bahagi naman, ito ay nakaguhit ng dilaw dahil ito ay kakulay ng araw. Ang araw ay sumisimbolo ng bagong pag-asa o pagkakataon.

Ang tao sa dalawang bahagi ay napalilibutan ng isang bilog. Ang bilog na ito ang kumakahon sa lahat ng elementong ginagamit ng mga manunulat sa pagsusulat ng tula. Sa madaling salita, ang bilog na ito ang sumisimbolo ng pormalistikong paraan ng pagsusulat. Kaya naman sa kaliwang bahagi ng bilog, ito ay buong buo dahil ang mga tula noon ay laging may sukat, tugma, atbp. Samantalang sa kanang bahagi naman, makikita na ang isang bahagi ng bilog ay pinutok ng manunulat. Mula roon lumabas ang iba't ibang elementong bumubuo sa pormalistikong paraan ng pagsusulat .

May bako-bakong linya sa kanang bahagi ng imahen, ito ang sumisimbolo sa iba-ibang estilo ng pasusulat. Ito ay bako-bako dahil walang iisang anyo ang makabagong pagsusulat, ngunit ito ay pumapaloob sa mga elementong ito dahil ito ay may iisang layunin at iyon ay ang pagnanais na maging iba.

Ang panghuli ay ang kulay sa likuran ng imahen. Sa kaliwang bahagi ng larawan ay ang kulay na itim. Simbolo ito ng pagiging "kept-in-the-dark" ng pagtula noon. Samantalang ang kulay sa kanang bahagi naman ay ang kulay na puti, na aking naunang naipahayag, na sumisimbolo sa pagkawalang-malay o ang pagkamalinis. Dahil ito ay malinis, madali itong sulatan ng pagbabago. Madaling makita ang mga bagong bagay na pilit ihinahayag ng mga tula.